ಕೆಎಸ್‌ಆರ್‌ಟಿಸಿ ಮಾಸಿಕ ಬಸ್‌ ಪಾಸ್‌ ದರ ಏರಿಕೆ – ಎಷ್ಟು ಹೆಚ್ಚಳವಾಗಿದೆ? ಪ್ರಯಾಣಿಕರ ಜೇಬಿಗೆ ಬೀಳುವ ಕತ್ತರಿ ಎಷ್ಟು ಗೊತ್ತಾ..?

ಬೆಂಗಳೂರು : ಕೆಲವು ದಿನದ ಹಿಂದಷ್ಟೇ ಸರ್ಕಾರ ಕೆಎಸ್‌ಆರ್‌ಟಿಸಿ ಬಸ್‌ ಟಿಕೆಟ್‌ ದರ ಹೆಚ್ಚಳ ಮಾಡಿತ್ತು. ಇದೀಗ ಅದರ ಮುಂದುವರೆದ ಭಾಗವಾಗಿ ಸಾರಿಗೆ ನಿಗಮವು ಮಾಸಿಕ ಪಾಸ್‌ಗಳ ದರ ಪರಿಷ್ಕರಿಸಿ ಆದೇಶಿಸಿದ್ದು, ಬುಧವಾರದಿಂದಲೇ ಜಾರಿಗೆ ಬಂದಿದೆ.
ಸಾಂದರ್ಭಿಕ ಒಪ್ಪಂದದ ಮೇಲೆ ಒದಗಿಸುವ ಬಸ್‌ಗಳ ಬಾಡಿಗೆಯನ್ನು ಪ್ರತಿ ಕಿ.ಮೀ. ದರದ ಮೇಲೆ ಸಾಮಾನ್ಯ ಸಾರಿಗೆ, ಅಶ್ವಮೇಧ, ಪಲ್ಲಕ್ಕಿ ಸೇರಿದಂತೆ 16 ಬಗೆಯ ಬಸ್‌ಗಳ ಬಾಡಿಗೆಯನ್ನು ಹೆಚ್ಚಿಸಲಾಗಿದೆ. ಐರಾವತ, ಅಂಬಾರಿ ಸೇರಿದಂತೆ ಎಸಿ ಬಸ್‌ಗಳಿಗೆ ಜಿಎಸ್‌ಟಿ ಹಾಗೂ ಟೋಲ್‌ ಶುಲ್ಕ ಸೇರಿದಂತೆ ದರ ಪರಿಷ್ಕರಿಸಲಾಗಿದೆ.
ವೇಗದೂತ ಹಾಗೂ ತಡೆರಹಿತ ಸಾರಿಗೆ ಬಸ್‌ಗಳಲ್ಲಿ ಸಾಮಾನ್ಯ ಪ್ರಯಾಣಿಕರ ಮಾಸಿಕ ಬಸ್‌ ಪಾಸ್‌ ದರ ಕನಿಷ್ಠ 70 ರೂ.ಗಳಿಂದ 420 ರೂ.ಗಳವರೆಗೆ ಏರಿಕೆ ಮಾಡಲಾಗಿದೆ. ಸಾಮಾನ್ಯ ಬಸ್‌ಗಳಲ್ಲಿ ಸಾಮಾನ್ಯ ಪ್ರಯಾಣಿಕರ ಮಾಸಿಕ ಪಾಸ್‌ ದರ ಕನಿಷ್ಠ 60 ರೂ.ಗಳಿಂದ 270 ರೂ.ಗಳವರೆಗೆ ಹೆಚ್ಚಳವಾಗಿದ್ದರೆ, ಹಿರಿಯ ನಾಗರಿಕರ ಮಾಸಿಕ ಪಾಸ್‌ ದರ ಕನಿಷ್ಠ 55 ರೂ.ಗಳಿಂದ 245 ರೂ.ಗಳವರೆಗೆ ಏರಿಕೆಯಾಗಿದೆ. ವೇಗದೂತ ಹಾಗೂ ತಡೆರಹಿತ ಸಾರಿಗೆಯಲ್ಲಿ ಸಾಮಾನ್ಯ ಪ್ರಯಾಣಿಕರು ಮಾಸಿಕ ಪಾಸ್‌ಗೆ ಪ್ರಸ್ತುತ ಕನಿಷ್ಠ ದರ 450 ರೂ. ವ್ಯಯಿಸುತ್ತಿದ್ದು, ಪರಿಷ್ಕೃತ ದರದ ಪ್ರಕಾರ 520 ರೂ. ವ್ಯಯಿಸಬೇಕಾಗಿದೆ. ಹಿರಿಯ ನಾಗರಿಕರು 405 ರೂ. ಬದಲಿಗೆ 465 ರೂ. ಒದಗಿಸಬೇಕು. ಸಾಮಾನ್ಯ ಸಾರಿಗೆಯಲ್ಲಿ ಕನಿಷ್ಠ ದರ ಸಾಮಾನ್ಯ ಪ್ರಯಾಣಿಕರಿಗೆ ಪ್ರಸ್ತುತ 400 ರೂ.ನಷ್ಟಿದ್ದು, ಪರಿಷ್ಕೃತ ದರ 460 ರೂ.ನೀಡಬೇಕಿದೆ. ಹಿರಿಯ ನಾಗರಿಕರು 360 ರೂ. ಬದಲಿಗೆ 415 ರೂ. ನೀಡಬೇಕು.
ವೇಗದೂತ ಹಾಗೂ ತಡೆರಹಿತ ಸಾರಿಗೆಯಲ್ಲಿ ಗರಿಷ್ಠ ದರ ಸಾಮಾನ್ಯ ಪ್ರಯಾಣಿಕರಿಗೆ ಪ್ರಸ್ತುತ 2,800 ರೂ. ಇದ್ದು, ಪರಿಷ್ಕೃತ ದರ 3,220 ರೂ. ಆಗಿದೆ. ಹಿರಿಯ ನಾಗರಿಕರು 2,520 ರೂ. ಬದಲಿಗೆ 2,900 ರೂ. ಒದಗಿಸಬೇಕು. ಸಾಮಾನ್ಯ ಸಾರಿಗೆಯಲ್ಲಿ ಗರಿಷ್ಠ ದರ ಸಾಮಾನ್ಯ ಪ್ರಯಾಣಿಕರಿಗೆ ಪ್ರಸ್ತುತ 1,800 ರೂ. ಇದ್ದು, ಪರಿಷ್ಕೃತ 2,070 ರೂ.ಆಗಲಿದೆ. ಹಿರಿಯ ನಾಗರಿಕರು ಪ್ರಸ್ತುತ 1,620 ರೂ. ಬದಲಿಗೆ 1,865 ರೂ. ನೀಡಿ ಮಾಸಿಕ ಪಾಸ್‌ ಪಡೆಯಬೇಕಿದೆ.