Tuesday, November 17, 2026
Homeಸ್ಪೋರ್ಟ್ಸ್19 ವರ್ಷಗಳ ಐಪಿಎಲ್ ವೃತ್ತಿಬದುಕಿಗೆ​​ ವಿದಾಯ ಹೇಳಿದ ಎಂ ಎಸ್ ಧೋನಿ: ಸಿಎಸ್​ಕೆಯಲ್ಲಿ ಹೊಸ ಇನ್ನಿಂಗ್ಸ್...

19 ವರ್ಷಗಳ ಐಪಿಎಲ್ ವೃತ್ತಿಬದುಕಿಗೆ​​ ವಿದಾಯ ಹೇಳಿದ ಎಂ ಎಸ್ ಧೋನಿ: ಸಿಎಸ್​ಕೆಯಲ್ಲಿ ಹೊಸ ಇನ್ನಿಂಗ್ಸ್ ಆರಂಭಿಸಿದ ಕೂಲ್ ಕ್ಯಾಪ್ಟನ್

Telegram Group
Join Now

2008ರ ಚೊಚ್ಚಲ ಐಪಿಎಲ್ ಆವೃತ್ತಿಯಿಂದಲೂ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅವಿಭಾಜ್ಯ ಅಂಗವಾಗಿದ್ದ ಧೋನಿ, ಫ್ರಾಂಚೈಸಿಯನ್ನು ಲೀಗ್‌ನ ಅತ್ಯಂತ ಸ್ಥಿರ ಮತ್ತು ಯಶಸ್ವಿ ತಂಡವಾಗಿ ಕಟ್ಟಿ ಬೆಳೆಸಿದರು. ಅವರ ನಾಯಕತ್ವದಲ್ಲಿ ಸಿಎಸ್‌ಕೆ ಬರೋಬ್ಬರಿ 5 ಐಪಿಎಲ್ ಟ್ರೋಫಿಗಳು (2010, 2011, 2018, 2021, 2023) ಹಾಗೂ 2 ಚಾಂಪಿಯನ್ಸ್ ಲೀಗ್ ಟಿ20 ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿದೆ.

ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಇತಿಹಾಸದ ಅತ್ಯಂತ ಯಶಸ್ವಿ ನಾಯಕ, ಕೋಟ್ಯಂತರ ಅಭಿಮಾನಿಗಳ ಆರಾಧ್ಯ ದೈವ ‘ಕ್ಯಾಪ್ಟನ್ ಕೂಲ್’ ಖ್ಯಾತಿಯ ಮಹೇಂದ್ರ ಸಿಂಗ್ ಧೋನಿ ತಮ್ಮ 18 ವರ್ಷಗಳ ಸುದೀರ್ಘ ಐಪಿಎಲ್ ಆಟಗಾರನ ವೃತ್ತಿಜೀವನಕ್ಕೆ ಅಧಿಕೃತವಾಗಿ ವಿದಾಯ ಘೋಷಿಸಿದ್ದಾರೆ.

ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಅಧಿಕೃತ ಪ್ರಕಟಣೆ ಹೊರಡಿಸಿರುವ ಚೆನ್ನೈ ಸೂಪರ್ ಕಿಂಗ್ಸ್, “ಒಬ್ಬ ಅಪರೂಪದ ಆಟಗಾರ, ಹೊಸ ಜವಾಬ್ದಾರಿ ಮತ್ತು ಎಂದಿಗೂ ಮುರಿಯದ ಬಂಧ. ಮಹೇಂದ್ರ ಸಿಂಗ್ ಧೋನಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಮೆಂಟರ್ ಆಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ತಂಡವನ್ನು ಯಶಸ್ಸಿನ ಶಿಖರಕ್ಕೆ ಕೊಂಡೊಯ್ಯುವುದರಿಂದ ಹಿಡಿದು ಮುಂದಿನ ಪೀಳಿಗೆಯ ಆಟಗಾರರಿಗೆ ಮಾರ್ಗದರ್ಶನ ನೀಡುವವರೆಗೆ, ಥಾಲಾ ಯಾವಾಗಲೂ ನಮ್ಮ ಗುರುತಿನ ಭಾಗವಾಗಿರುತ್ತಾರೆ” ಎಂದು ಭಾವನಾತ್ಮಕವಾಗಿ ಬರೆದುಕೊಂಡಿದೆ.

ಧೋನಿ ಅವರ ಹೊಸ ಪಾತ್ರದ ಕುರಿತು ಪ್ರತಿಕ್ರಿಯಿಸಿರುವ ಸಿಎಸ್‌ಕೆ ಮಾಲೀಕ ಎನ್. ಶ್ರೀನಿವಾಸನ್ ಭಾವುಕರಾಗಿ ಮಾತನಾಡಿದ್ದಾರೆ. “ಎಂಎಸ್ ಧೋನಿ ಇಲ್ಲದೆ ಸಿಎಸ್‌ಕೆ ಇಲ್ಲ. ಕಳೆದ ಎರಡು ದಶಕಗಳಿಂದ ನಾವು ಜೊತೆಯಾಗಿ ಹೆಜ್ಜೆ ಹಾಕಿದ್ದೇವೆ. 2008ರಲ್ಲಿ ಮೊದಲ ಹರಾಜಿನ ವೇಳೆ ಧೋನಿ ನಮ್ಮ ತಂಡದಲ್ಲಿರಲೇಬೇಕು ಎಂದು ನಾನು ಪಟ್ಟುಹಿಡಿದಿದ್ದೆ. ಅದು ನಾನು ತೆಗೆದುಕೊಂಡ ಅತ್ಯುತ್ತಮ ನಿರ್ಧಾರವಾಗಿತ್ತು. ಅವರ ನಾಯಕತ್ವದಲ್ಲಿ ತಂಡವು ಅಪಾರ ಯಶಸ್ಸು ಕಂಡಿದೆ ಮತ್ತು ಚೆನ್ನೈ ಯಾವಾಗಲೂ ಅವರ ಮನೆಯಾಗಿರುತ್ತದೆ” ಎಂದು ಶ್ರೀನಿವಾಸನ್ ಶ್ಲಾಘಿಸಿದ್ದಾರೆ.

2008ರ ಚೊಚ್ಚಲ ಐಪಿಎಲ್ ಆವೃತ್ತಿಯಿಂದಲೂ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅವಿಭಾಜ್ಯ ಅಂಗವಾಗಿದ್ದ ಧೋನಿ, ಫ್ರಾಂಚೈಸಿಯನ್ನು ಲೀಗ್‌ನ ಅತ್ಯಂತ ಸ್ಥಿರ ಮತ್ತು ಯಶಸ್ವಿ ತಂಡವಾಗಿ ಕಟ್ಟಿ ಬೆಳೆಸಿದರು. ಅವರ ನಾಯಕತ್ವದಲ್ಲಿ ಸಿಎಸ್‌ಕೆ ಬರೋಬ್ಬರಿ 5 ಐಪಿಎಲ್ ಟ್ರೋಫಿಗಳು (2010, 2011, 2018, 2021, 2023) ಹಾಗೂ 2 ಚಾಂಪಿಯನ್ಸ್ ಲೀಗ್ ಟಿ20 ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿದೆ. ಅಲ್ಲದೆ, ದಾಖಲೆಯ 10 ಬಾರಿ ತಂಡವನ್ನು ಐಪಿಎಲ್ ಫೈನಲ್‌ಗೆ ಕೊಂಡೊಯ್ದ ಕೀರ್ತಿಯೂ ಧೋನಿ ಅವರಿಗೆ ಸಲ್ಲುತ್ತದೆ.

ಆಟಗಾರನಾಗಿ ಧೋನಿ ಅವರ ಐಪಿಎಲ್ ಅಂಕಿಅಂಶಗಳು ಕೂಡ ಅಷ್ಟೇ ಅಮೋಘವಾಗಿವೆ. ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ರೈಸಿಂಗ್ ಪುಣೆ ಸೂಪರ್‌ಜೈಂಟ್ಸ್ ಪರ ಒಟ್ಟು 278 ಐಪಿಎಲ್ ಪಂದ್ಯಗಳನ್ನಾಡಿರುವ ಧೋನಿ, 38.30ರ ಉತ್ತಮ ಸರಾಸರಿ ಮತ್ತು 137.45ರ ಸ್ಫೋಟಕ ಸ್ಟ್ರೈಕ್ ರೇಟ್‌ನಲ್ಲಿ 5,439 ರನ್ ಕಲೆಹಾಕಿದ್ದಾರೆ. ಇದರಲ್ಲಿ 24 ಅರ್ಧಶತಕಗಳು ಹಾಗೂ 264 ಭರ್ಜರಿ ಸಿಕ್ಸರ್‌ಗಳು ಸೇರಿವೆ. ಇನ್ನು ವಿಕೆಟ್ ಕೀಪರ್ ಆಗಿ 158 ಕ್ಯಾಚ್ ಮತ್ತು 47 ಸ್ಟಂಪಿಂಗ್ ಮಾಡುವ ಮೂಲಕ ಐಪಿಎಲ್ ಇತಿಹಾಸದಲ್ಲಿ ಅತಿ ಹೆಚ್ಚು ಬಲಿ ಪಡೆದ ಕೀಪರ್ ಎಂಬ ದಾಖಲೆಯನ್ನೂ ಹೊಂದಿದ್ದಾರೆ.

ಇನ್ನು ಧೋನಿ ಆಟಗಾರನಾಗಿ ನಿವೃತ್ತಿ ಘೋಷಿಸಿರುವುದರಿಂದ, ಮುಂಬರುವ ಡಿಸೆಂಬರ್ 16ರಂದು ಗೋವಾದಲ್ಲಿ ನಡೆಯಲಿರುವ 2027ರ ಐಪಿಎಲ್ ಮಿನಿ ಹರಾಜಿಗೂ ಮುನ್ನ ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕೆ ಆರ್ಥಿಕವಾಗಿಯೂ ಕೊಂಚ ಬಲ ಸಿಕ್ಕಂತಾಗಿದೆ. ಕಳೆದ ಮೆಗಾ ಹರಾಜಿನಲ್ಲಿ ಅನ್‌ಕ್ಯಾಪ್ಡ್ ಆಟಗಾರನ ಕೋಟಾದಡಿ ₹4 ಕೋಟಿಗೆ ರೀಟೈನ್ ಆಗಿದ್ದ ಧೋನಿ ಅವರ ನಿರ್ಗಮನದಿಂದ, ಇದೀಗ ಸಿಎಸ್‌ಕೆ ಹರಾಜು ಪರ್ಸ್‌ಗೆ ₹4 ಕೋಟಿ ಹೆಚ್ಚುವರಿಯಾಗಿ ಸೇರ್ಪಡೆಯಾಗಲಿದೆ.

ಒಟ್ಟಾರೆಯಾಗಿ, ಮೈದಾನದಲ್ಲಿ ಹಳದಿ ಜೆರ್ಸಿ ತೊಟ್ಟು ಕೊನೆಯ ಓವರ್‌ಗಳಲ್ಲಿ ಸಿಕ್ಸರ್ ಸಿಡಿಸುತ್ತಿದ್ದ ಧೋನಿ ಅವರ ಬ್ಯಾಟಿಂಗ್ ಮತ್ತು ಚಾಣಾಕ್ಷ ವಿಕೆಟ್ ಕೀಪಿಂಗ್ ಅನ್ನು ಅಭಿಮಾನಿಗಳು ಖಂಡಿತವಾಗಿಯೂ ಮಿಸ್ ಮಾಡಿಕೊಳ್ಳಲಿದ್ದಾರೆ. ಆದರೆ, ಇನ್ಮುಂದೆ ತಂಡದ ಡಗೌಟ್‌ನಲ್ಲಿ ಕುಳಿತು ಮುಖ್ಯ ಕೋಚ್ ಸ್ಟೀಫನ್ ಫ್ಲೆಮಿಂಗ್ ಜೊತೆಗೂಡಿ ಯುವ ಆಟಗಾರರಿಗೆ ತಂತ್ರಗಾರಿಕೆ ಹೇಳಿಕೊಡುವ ಗುರುವಾಗಿ ತಲಾ ಕಾಣಿಸಿಕೊಳ್ಳಲಿರುವುದು ಚೆನ್ನೈ ಅಭಿಮಾನಿಗಳಿಗೆ ಸಮಾಧಾನ ತಂದಿದೆ.

RELATED ARTICLES

LEAVE A REPLY

Please enter your comment!
Please enter your name here

- Advertisment -

Most Popular

Recent Comments

error: Content is protected !!