ಟೊಮೆಟೊ ಪ್ರಪಂಚದ ಅತ್ಯಂತ ಶ್ರೇಷ್ಠ ಹಣ್ಣು! ಇದು ಕೇವಲ ಮಾತಲ್ಲ, ಅಮೆರಿಕದ ಆರೋಗ್ಯ ಸಂಸ್ಥೆ ‘ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಷನ್’ (CDC) ಸಂಶೋಧಕರು ಇದನ್ನು ಸಾಬೀತುಪಡಿಸಿದ್ದಾರೆ. ಪೋಷಕಾಂಶಗಳಿಂದ ಸಮೃದ್ಧವಾಗಿರುವ 41 ಹಣ್ಣು ಮತ್ತು ತರಕಾರಿಗಳನ್ನು ಅಧ್ಯಯನಕ್ಕೆ ಒಳಪಡಿಸಿದಾಗ, ಟೊಮೆಟೊ ಈ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿದೆ.
ಟೊಮೆಟೊದಲ್ಲಿನ ಪೋಷಕಾಂಶಗಳ ಸಾಂದ್ರತೆ (Nutrient Density) 20.37 ರಷ್ಟಿದೆ. ಇದರಲ್ಲಿರುವ ಲೈಕೋಪೀನ್ ಎಂಬ ಪ್ರಬಲ ಆಂಟಿಆಕ್ಸಿಡೆಂಟ್ ಹೃದಯದ ಆರೋಗ್ಯವನ್ನು ಕಾಪಾಡುತ್ತದೆ ಮತ್ತು ದೇಹದಲ್ಲಿನ ಒತ್ತಡವನ್ನು ಕಡಿಮೆ ಮಾಡುತ್ತದೆ. ಇದಲ್ಲದೆ, ಟೊಮೆಟೊ ವಿಟಮಿನ್ ಸಿ, ವಿಟಮಿನ್ ಕೆ ಮತ್ತು ಪೊಟ್ಯಾಸಿಯಮ್ನಂತಹ ಪ್ರಮುಖ ಪೋಷಕಾಂಶಗಳ ಗಣಿಯಾಗಿದೆ.
ಟೊಮೆಟೊ ಹಣ್ಣೋ ಅಥವಾ ತರಕಾರಿಯೋ?
ವೈಜ್ಞಾನಿಕವಾಗಿ ಟೊಮೆಟೊ ಒಂದು ಹಣ್ಣು. ಏಕೆಂದರೆ ಇದು ಹೂವಿನಿಂದ ಅಭಿವೃದ್ಧಿಗೊಳ್ಳುತ್ತದೆ ಮತ್ತು ಒಳಗೆ ಬೀಜಗಳನ್ನು ಹೊಂದಿರುತ್ತದೆ. ಆದರೆ ಅಡುಗೆಯಲ್ಲಿ ಇದನ್ನು ಹೆಚ್ಚಾಗಿ ತರಕಾರಿಯಾಗಿ ಬಳಸುವುದರಿಂದ ಜನರು ಇದನ್ನು ತರಕಾರಿ ಎಂದೇ ಭಾವಿಸುತ್ತಾರೆ.
ಟೊಮೆಟೊದಲ್ಲಿದೆ ಉತ್ತಮ ಪೌಷ್ಟಿಕಾಂಶ
ಟೊಮೆಟೊದಲ್ಲಿ ಕಡಿಮೆ ಕ್ಯಾಲೋರಿ ಮತ್ತು ಹೆಚ್ಚಿನ ನೀರಿನಂಶವಿದೆ. 100 ಗ್ರಾಂ ಟೊಮೆಟೊದಲ್ಲಿ ಕೇವಲ 18-20 ಕ್ಯಾಲೋರಿಗಳಿರುತ್ತವೆ. ಇದರಲ್ಲಿ ಕಾರ್ಬೋಹೈಡ್ರೇಟ್ ಕಡಿಮೆ ಇದ್ದು, ಫೈಬರ್ ಹೆಚ್ಚಾಗಿರುತ್ತದೆ ಮತ್ತು ಕೊಬ್ಬಿನಂಶವಿರುವುದಿಲ್ಲ.
ಟೊಮೆಟೊದ ಆರೋಗ್ಯ ಪ್ರಯೋಜನಗಳು
ಟೊಮೆಟೊ ಅನೇಕ ರೀತಿಯಲ್ಲಿ ದೇಹಕ್ಕೆ ಪ್ರಯೋಜನಕಾರಿ:
- ಜೀರ್ಣಕ್ರಿಯೆ: ಇದರಲ್ಲಿರುವ ಫೈಬರ್ ಜೀರ್ಣಕ್ರಿಯೆಯನ್ನು ಸುಧಾರಿಸಿ ಮಲಬದ್ಧತೆಯನ್ನು ಕಡಿಮೆ ಮಾಡುತ್ತದೆ.
- ರೋಗನಿರೋಧಕ ಶಕ್ತಿ: ವಿಟಮಿನ್ ಸಿ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ.
- ರಕ್ತದೊತ್ತಡ: ಪೊಟ್ಯಾಸಿಯಮ್ ರಕ್ತದೊತ್ತಡವನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ.
- ಹೃದಯದ ಆರೋಗ್ಯ: ನಿಯಮಿತ ಸೇವನೆಯು ಹೃದಯದ ಕಾರ್ಯವನ್ನು ಉತ್ತಮಗೊಳಿಸುತ್ತದೆ.
- ಹೈಡ್ರೇಶನ್: ಹೆಚ್ಚಿನ ನೀರಿನಂಶ ದೇಹವನ್ನು ಹೈಡ್ರೀಕರಿಸುತ್ತದೆ.
ಆಂಟಿಆಕ್ಸಿಡೆಂಟ್ಗಳಿಂದ ತುಂಬಿದೆ ಟೊಮೊಟೊ ಹಣ್ಣು ಇದರಲ್ಲಿ ಲೈಕೋಪೀನ್, ಬೀಟಾ-ಕ್ಯಾರೋಟಿನ್ ಮತ್ತು ವಿಟಮಿನ್ ಸಿ ಇವೆ. ಇವು ದೇಹದ ಜೀವಕೋಶಗಳಿಗೆ ಹಾನಿ ಮಾಡುವ ಮುಕ್ತ ರಾಡಿಕಲ್ಗಳನ್ನು ತಡೆಯುತ್ತವೆ. ಲೈಕೋಪೀನ್ ಹೃದಯ ಕಾಯಿಲೆ ಮತ್ತು ಕೆಲವು ವಿಧದ ಕ್ಯಾನ್ಸರ್ ಅಪಾಯವನ್ನು ಕಡಿಮೆ ಮಾಡುತ್ತದೆ.
ಪ್ಮಧುಮೇಹಿಗಳಿಗೆ ಟೊಮೆಟೊ ಸುರಕ್ಷಿತವೇ?
ಹೌದು, ಇದು ಮಧುಮೇಹಿಗಳಿಗೆ ಉತ್ತಮ ಆಹಾರ. ಇದರ ಗ್ಲೈಸೆಮಿಕ್ ಇಂಡೆಕ್ಸ್ ಕಡಿಮೆ ಇರುವುದರಿಂದ ಇದು ರಕ್ತದ ಸಕ್ಕರೆಯ ಮಟ್ಟವನ್ನು ದಿಢೀರ್ ಹೆಚ್ಚಿಸುವುದಿಲ್ಲ.
ಗರ್ಭಿಣಿಯರು ಟೊಮೆಟೊ ತಿನ್ನಬಹುದೇ?
ಗರ್ಭಿಣಿಯರಿಗೆ ಇದು ತುಂಬಾ ಪ್ರಯೋಜನಕಾರಿ. ಇದರಲ್ಲಿರುವ ಫೋಲೇಟ್ ಭ್ರೂಣದ ಮೆದುಳು ಮತ್ತು ಬೆನ್ನುಮೂಳೆಯ ಬೆಳವಣಿಗೆಗೆ ಸಹಾಯ ಮಾಡುತ್ತದೆ. ಕಬ್ಬಿಣದ ಹೀರಿಕೊಳ್ಳುವಿಕೆಗೆ ವಿಟಮಿನ್ ಸಿ ನೆರವಾಗುತ್ತದೆ. ಆದರೆ ಅತಿಯಾಗಿ ಸೇವಿಸಿದರೆ ಆಸಿಡಿಟಿ ಆಗಬಹುದು, ಆದ್ದರಿಂದ ಮಿತವಾಗಿರಲಿ.
ಪ್ಟೊಮೆಟೊವನ್ನು ಬೇಯಿಸಿ ತಿನ್ನಬೇಕೋ ಅಥವಾ ಹಸಿಯಾಗಿ ತಿನ್ನಬೇಕೋ?
ಎರಡೂ ರೀತಿಗಳಲ್ಲೂ ಪ್ರಯೋಜನವಿದೆ. ಹಸಿ ಟೊಮೆಟೊ ತಿಂದರೆ ಹೆಚ್ಚು ವಿಟಮಿನ್ ಸಿ ಸಿಗುತ್ತದೆ. ಆದರೆ ಬೇಯಿಸಿದರೆ ಅದರಲ್ಲಿರುವ ಲೈಕೋಪೀನ್ ಹೆಚ್ಚು ಸಕ್ರಿಯವಾಗುತ್ತದೆ, ಇದು ಹೃದಯಕ್ಕೆ ಒಳ್ಳೆಯದು.
ಟೊಮೆಟೊ ಸೇವನೆಯಲ್ಲಿ ಯಾರು ಎಚ್ಚರಿಕೆ ವಹಿಸಬೇಕು!
ಟೊಮೆಟೊ ಆರೋಗ್ಯಕರವಾಗಿದ್ದರೂ, ಈ ಕೆಳಗಿನ ಸಮಸ್ಯೆ ಇರುವವರು ಎಚ್ಚರದಿಂದಿರಬೇಕು:
- ಆಸಿಡಿಟಿ: ಟೊಮೆಟೊ ಆಮ್ಲೀಯ ಗುಣವನ್ನು ಹೊಂದಿರುವುದರಿಂದ ಅತಿಯಾದ ಗ್ಯಾಸ್ ಅಥವಾ ಆಸಿಡಿಟಿ ಇರುವವರಿಗೆ ತೊಂದರೆ ಉಂಟುಮಾಡಬಹುದು.
- ಮೂತ್ರಪಿಂಡದ ಕಲ್ಲು (Kidney Stone): ಇದರಲ್ಲಿ ಆಕ್ಸಲೇಟ್ಗಳಿರುವುದರಿಂದ ಮೂತ್ರಪಿಂಡದ ಕಲ್ಲು ಇರುವವರು ವೈದ್ಯರ ಸಲಹೆಯಂತೆ ಮಿತವಾಗಿ ಸೇವಿಸಬೇಕು.
- ಅಲರ್ಜಿ: ಕೆಲವು ಜನರಿಗೆ ಟೊಮೆಟೊ ತಿಂದರೆ ಚರ್ಮದಲ್ಲಿ ದದ್ದು ಅಥವಾ ತುರಿಕೆ ಉಂಟಾಗಬಹುದು.
ದಿನಕ್ಕೆ 2 ರಿಂದ 3ಮಧ್ಯಮ ಗಾತ್ರದ ಟೊಮೆಟೊಗಳನ್ನು ಸಲಾಡ್ ರೂಪದಲ್ಲಿ ಅಥವಾ ಆಹಾರದ ಭಾಗವಾಗಿ ಸೇವಿಸುವುದು ಹೆಚ್ಚಿನವರಿಗೆ ಸುರಕ್ಷಿತ ಮತ್ತು ಪ್ರಯೋಜನಕಾರಿ.
